Ord for dagen 30.03.2021 sokneprest Eli Vatn

 Til minne om Jesus som gjekk inn på tempelplassen og dreiv ut alle som selde og kjøpte der. Han velte borda til pengevekslarane og benkene til dei som selde duer og sa til dei: «Det står skrive: Mitt hus skal kallast eit bønehus. Men de gjer det til ei røvarhòle.» (jfr Matteus 21).

Kloke menneske har sagt at sinne er reaksjonen på at det som er verdifullt for oss vert truga. Sinne er ein vanskeleg reaksjon – ofte destruktiv fordi han er så voldsom! Men det er verdt å leite bak sinnet for å finne kva er det som er truga her; kva er det av verdi som er truga?

For Jesus var det denne dagen bønehuset, huset som skulle gje ly og tryggleik for eit hjarte å opne seg i bøn; finne fred.

Lyskapellet; eit av dei bønerom som opnar døra ikkje berre fysisk men og hjartedøra. Grunna koronaen har døra vore stengd i over eit år no. Måtte ein i denne tida finne andre rom for bøn og opne hjarte.